انــــــــــــــــــا مش بحبــــــــــــــــــــــــــــك.

أنا مش بحبك..
ولا دُبت فيكي.
ولا قلبي عاشقك..
وحيموت عليكي.
ولا نفسي دايما تكوني معايا..
ولا نفسي أشوفك..
وأبص ف عنيكي.
ولا نفسي أضمك لحضني تَـمَلَّي..
ولا نفسي أخلِّي..
إديا ف إديكي.
ولا انتي ف بالي..
وساكنه خيالي..
ولا مالكه عقلي..
ودايما ناسيكي.
ولا بتلهميني بأحلى قصايدي..
ولا نفسي أهدي ديواني إليكي.
ولا كل ليله بشوفك ف حلمي..
ولا حلمي إني أعيش بس ليكي.
ولا حتى سحرك مشقلب كياني..
ولا البدر دايما مفكرني بيكي.
***
ولو يوم يعدي وماشفتكيش..
مابيهمنيش.
ولا ازعل واعيط..
ولا احس إني مابقدرش اعيش.
ولا احس إن الـحياه ماتساويش.
ولا احس إن القصايد ف غيرك كلام خنتريش.
ولو حد قالك عليا "بيكدب"..
قوليلو "بتكدب" وماتصدقيش.
وإنشالله يارب لو كنت بكدب..
إلهي وجاهي ألاقيكي جنبي..
شريكتي ف حياتي وماتبعديش.
ودي حاجه طبْعا مابتمنهاش..
ولو تعرضيها عليا بنفسك..
حقولك بلاش..
فإوعي تحاولي ومتفكريش.
وخليكي عارفه.. وماتأخذنيش..
وجودك ماهواش بيفرق معايا..
ولا بُعدي عنك بداية النهايه..
وحُسنك ماهواش حكاية وآيه..
ولا نفسي قلبك يـجاوب ندايا..
شعوري تجاهك حبيبتي مفيش.
وكلمة "حبيبتي" دي زلة لسان..
وملهاش علاقه بـحاجه ف قلبي مـخبيها عنك بقالي زمان..
ماتتلككيش.
سبيني ف حالي..
أفكر ليالي..
واشوف ليه عيونك مابيشدونيش !!!

الله الله ماشالله ابداع تميز طرح جميل من وحده اجمل


تسلم الايادى اخى